ا
هو عجلان بن برغش من الرمال من الغفيله من سنجاره من شمر ...
اشهر من نار على علم في حل القضايا المستعصيه !!
وهبه الله حدة الذكاء ، بعد النظر ، سعة البال ..!!
يعد من عوارف زمانه المعدودين والمشهورين !!
شارك في كثير من معارك شمر ، وكثير ما اسند الامر اليه
لانتصارات قبيلته بفضل تخطيطه وحسن تدبيره وتصرفه في
إدارته للمعارك .. فعندما يشارك يكون الثقل لهم !!
فيزرع الثقة في نفوس فرسانه من ربعه ...
رجل يعد من دهاة العرب بمعنى الكلمه !!
ومن الصعب علينا التطرق لسيرة هذا العلم بموضوع او موضوعين
في حين ان مآثره وقصصه ورواياته واشعاره تحويها امهات الكتب
وصدور الرواة وهي اكثر بكثير من الطرح المستفيض ..!؟
ولكن اقطفنا لكم من حديقة الزهور ازكاهن واطيبهن ..!؟
واكثر تميزاً وإمتاعاً للعامة ..؟
كان رجل شجاع ، كريم وشاعر .. حكمته غلبة على باقي صفاته ..!؟
من حكمته :-
يقولون : ان خلف الاذن الفارس المشهور من الروله سأل سؤال !؟
قال خلف الاذن :-
انشدكم عن هبال وهبال وهبال !؟
ومر بلغزه على عنزة والروله ومالقى بينهم اللي يحله ..؟
الجميع بهت ولاحد حله !!
وتواجه بيوم من الايام هو وعجلان وعرض اللغز عليه !!
قال عجلان :-
الهبال الاول: " نطح الرجال بليا رجال " !!
الهبال الثاني: " ورد البير بليا حبال " !!
الهبال الثالث: " اخذ المره وهي ماتجيب عيال " !!
شاعريته ...
صار هناك خلاف بينه وبين ناس من جماعته ؛ وارحلوا من عنده للجزيرة ..؟
يقولون : يوم مر من عند مراحهم تذكرهم .. تهيض .. وقال :-
ياحن قلبي حن ركب مواجيـف=حفيا وذاعرهن مع الذل جوعـي
قلبي تذكر دار ربعن بهم كيـف=ناخذ بهرجتهم سبوع السبوعـي
وان قيل لعيون البنات الغطاريف=عند الركاب يذبحون الفزوعـي
غدت بهم عدلات الايام ياسيـف=وتجلبة غبـر الليالـي ربوعـي
يالله طلبتك ياوسيـع الاطاريـف=تشد حبل الوصل عقب القطوعي
ايمن جهامتهم وطا الشط والسيف=وايسر جهامتهم وطن الشموعي
راحوا كما غيم تحده عواصيـف=ومن وين ماهب الهوا له يلوعي
وتشاء الأقدار ويرحل عجلان بن رمال نفسه للجزيرة ..!!
ففي اواسط القرن الثالث عشر كانت هجرت عجلان الى الجزيرة !؟
وذكروا عدة اسباب ادت الى رحيله !! ماهن قضيتنا ..!!
ايا كانت الأسباب .؟؟
المهم انه قال اجمل قصائده بتلك المناسبة .. يقول :-
ياسيف تر طب البغيضين الابعاد=ارحل ويرضنك بعاد السهـالا
لولا العنا ياسيف ماجيت بغـداد=جيته وجابن له عزيز الجـلالا
الله من نوم له العيـن رصـاد=لاجيت اباارقد قالت العين لا لا
ويوم رحل للجزيرة نزل بجوار الشيخ فهد بن هذال شيخ مشايخ
عنزه وجلس عنده خمس سنيين ؛ المهم هناك صار خلاف باحد مجالس
بغداد بين شمامرة وعنوز علشان المغازي اللي بين شمر وعنزة .؟
المهم كانت نتيجة تلك المغازي لصالح شمر ...
قالوا دوروا لكم واحد يحكم بينكم ..؟
قال واحد منهم سمعنا ان عجلان بن رمال موجود عند الشيخ فهد
ونبيه يحكم بيننا وكان عجلان بن رمال مشهور بقول الحق ...
وافق العنوز على حكم عجلان ومن بين الحضور كان هناك الشيخ
محروت بن فهد بن هذال ؛ قال محروت انا اروح واجيبه لكم مادامه
عند ابوي ، راح محروت وجابه ويوم اجتمعوا قالوا احكم ياعجلان !!
رفض عجلان بالبدايه يحكم بينهم ولكنهم الحوا عليه ...
المهم حكم عجلان لصالح الشمامرة .. حقاً وليس حميه ..؟
ويوم رجعوا الشيخ محروت وعجلان وهم بالطريق جلس محروت بن هذال
يتمثل بالبيت الي يقول :-
ياطير بن برمان جبنـاك حنـا ** يامدودل الحيه على راس راعيه
قال عجلان بن رمال : يا محروت !! مضن خمس وبقى ثلاث !؟
محروت مافهم السالفة .!!
يوم جاء من باكر ورحل يا عجلان .. وماعلم به احد !؟
استغرب الشيخ فهد !! وقال: يامحروت عجلان مارحل هالون !؟
قال لك شي قبل يرحل !؟
قال محروت: اي والله قال له حاجه وانا مافهمته ؟؟
قال ابوه : وشي هالحاجة وانا ابوك !؟
قال محروت " راحن خمس وبقى ثلاث " !!
قال فهد: الوكاد انك ازعلته ؛ لانه يقصد جيرة المهادي !؟
اللي يضرب به المثل .. يوم يصبر على اذى قصيره ثمان سنيين!!
وعجلان له خمس سنين عندنا وباقي ثلاث سنين ..؟
اخذ بالجزيرة مدة من الزمن ثم انه يوم بغى الرجوع لحايل
ارسل قصيدته المشهور .. قال :-
متى يجينا طارش فوق مشدود=ويخبرن عن دارنا وش جرابه
رد عليه كثير من الشعراء ؛ من ضمنهم خلف بن غازي يوم يقول :-
ليا جيت لي عجلان من فوق مشدود=سلم عليه وخبره وش جـرى بـه
انتم نهجتوا ماصبرتوا على الكـود=وحنا صبرنا بـه علـى مالنـا بـه
وان كان ودك تبي الاخبـار وردود=اقبل ترى الديـره عزيـز جنابـه
عقب هالقصيدة بمدة قصيرة طب عـجـلان حايل .. وخذاله ايام عند ربعه
ثم قال لهم: ودي اسلم على ابن مـساعـد !!؟
بذلك الوقت كان عبد العزيز ابن مساعد لـه اربع اوخمس سنين امير
على الديرة .. يوم جأ عجلان ودخل القصر ..!!
سلـم على الامير وعلى الجالسين ..
قال الامير : الحمد لله على السلامه ! وش اللى جابك ياعجلان .؟
على طول رد عليه عجلان قال :
يامير جـيـتـك يـوم سـكـر هـبـوبي ** ابي ليـان النـفـود هو ونخلا تي
وابـي انـشـدك عـن مطـوعين الخـبوبـي ** هـم يضربـونن لو يغـنن بناتـي
وابي انـشـدك عـن حـشـو ذهــوبـى ** حـشـو غـفال وسومهن بـيناتــي
قال الامير: ياعجلان ابشر بالعز كان نيدك الغنا ..!!
غـن انت وبناتك من تطلع الشمس الياما تغي ..؟
والله ما واحدٍ يتعرض لكم وانا ابو عبدالله ..!!
امـا حشوك اللى انت تذكر يابعدهن عليك ..؟
مـاجازة لعجلان هالكليمه التاليه ؛ كتمه ويوم خذا شوي !!
لاحظ الامير تغير وجه عجلان ؛ وحاول يداعبه بالكلام ..!
قال له : يقولون انك كبير ياعجلان .!؟
قال عجلان : اي بالله مانا صغير !!!
قال الامير : وش كبرك يوم حنا نـذبح سميك عـجلان
في الـمـصمك الله يـحـييـك .؟
على طـول عـجلان انتبه قـال : لااااا ياطويل العمر انا تـقدر
تقول اني ابو سبع طعش او ثمان طعش ؛ وانا مع السربة اللى
جـابت رأس عـمـك غـزلآن مـن مـقـصورة ابن عـفـيـصان بالـخـرج!!
وعليك الـحساب ..؟
قال الامير : ياعجلان ماجبته على هذي .!!
قال عجلان : وانا ماجبته على هذيتس ..؟
طال النقاش بينهم واحـتـد قام احـد الجالسين ومعه واحـد آخر
قال: ياعجلان!! يـوم الله جابك تبي يـسمـح لنا ابـو عبدالله
ودنا نـقـهـويك وتطب مـحـلنا .!!
قـصدهم من ذلك تـضييـع السالفه ..؟
ويقال: ان اللي سواه الآيـدا من شيوخ عنزة .. فهـذا التصرف السليم..!!
توفي عجلان ابن رمال بحايل حوالي تقريبا عام 1368هـ
اتمنى اكون قدمت لو الشي اليسير من حقوق الأوائل علينا ...
تحيتي