يقول السنيدي :
يقصد بسعود ابن عبدالعزيز المتعب يوم يزبنون به خواله للمدينة خوف من عيال حمود العبيد
اللي ذبحوا عيال الجنازة واللي هم عيال اختهم
وسعود ابو خشم خواله السبهان زبّنوه للمدينة
السنيدي ماهو من اهل حايل ولكنه يحب شمر ومنهو اللي يعاشر شمري ويبيعه الا خايب الرجا
القصيدة لقيته بأوراق عندي قديمه وكتبته والشاهد الله بيدي ماهي نسخ ولا لصق
وإذا فيه خطا يالربع ترونا يد وحدة ولاحد ينقد يعطينا الصحيح
وعساكم تلقون به مايفيد
يالله ياسمّـاع صـوت المهـتـدي=جنح الظلام وخاضع لك يسجـدي
ندعوك مـا ندعـي الـه غيـرك=يالواحد اللـي بالسمـاء متوحِّـدي
تجبر عـزا دار ٍ تحـن ركونهـا=حنّت من الفرقـا حنيـن مفـرِّدي
دار ٍ تقلقـل نورهـا مـن جالهـا=واظلم جنابه عقـب راع المسنـدي
من عقب ما جنب الهنوف حرابـه=عنها الضديد من المهابـه مبعـدي
صارت مربـى للثعالـب والرخـم=والنيص دلّى في حقوقـه يفسـدي
جاه الهـزل والـذل مـن سكانـه=حنشـل هتيـم بالزبـارة تلـبـدي
مـا تاخـذ الحقـان مـن قبيـلـه=شره على راع البسـاط الأحمـدي
زمـل ٍ تـرد ارقابهـا لوثورهـا=تنتف وبرها وااا عساهـا تجحـدي
انا برجوى فالـق الحـب والنـوى=عالم دبيب النمل والليـل اسـودي
يرجع علـى تـال البـلاد بعزنـا=فهود الزراج اهل السيوف الورِّدي
سعود ٍ ولـد عبدالعزيـز وخالـه=خال ٍ على زحم الطراد هو البـدي
إليا اختلـط راس الجـواد وذيلـه=خيل المعادي عن جنابـه شـرِّدي
من بين ابوه وخاله الطيِّـب ظهـر=بالود مفـراص الحديـد المبـردي
جا من ظهر سبهان كسّـاب الثنـا=حكم البلـد بينـه وبيـن محمّـدي
الله يجعـل عزنـا بــه دايــم=تالي هل الوجه الحميـد الأمجـدي
ولد الذي وان جت مراهيـم العـدا=واشتب نـار ٍ بالصريـف توقّـدي
يوم اصحاب الرفاقه ينتخي سابقـه=اقفـت وقامـت بالغـزال تنقّـدي
وحنا بثـر فهـد الـزراج وكننـا=سباع ٍ بهيشـان الضبـاع تجعّـدي
يا حمـود حايـل والعليـا تنتظـر=منك المرد وسقاي شراع الـورّدي
يا حمود لو تسمع حنين ضلوعنـا=ما قمـت يـوم بالمدينـة مفـردي
حنّت لك السمراء ورمـان الحمـر=واطراف جلدية وضلـع اباعـدي
وخشوم سلمى والعنـود بصوتهـا=تقول وين حمـود ستـر الجـرِّدي
اقدم وتبرى لـك مفاتيـح الفـرج=ولى جيت دار الشمرين فترشـدي
سم وتوجـه لـم ضلعـان الجبـل=ثم اعتصـم بالله وانـت مساعـدي
عجّل بولد الحظف يسكـن دارنـا=عن كـل طمّـاع علينـا معتـدي
واظن باقي الحظف وان مسه اللحم=الروح عنـد ربـه لازم تصعـدي
وإلا فـلا نصبـر حذاكـم ساعـة=محد ٍ على العوشز يحطّ المرقـدي
إنصب ولـد عبدالعزيـز المتعـب=باغيه لى عقـب القوامـا سيّـدي
هذا ولد هذاك ومـا غـاب إحتضـر=وما خلّف الضاري يجي منه ازودي
يا ما فقدهم من ضعيـف وضايـق=ومن شايب ٍ على العصا يتوجّـدي
وانا من الجيـران حالـي حالكـم=بالنـار وإلا بالنعـيـم مخـلّـدي
لي ديرة بيـن الشعيـب وصـاره=بيـن الهلاليـة وابـان الأسـودي
يقبس من اشناقه زعاطيـر الظفـر=عيّت عن اطواب العساكر تهتـدي
عفنـاه لأجـل متيهيـن النـاقـه=اهل حمـى ذروات يـم الأجـردي
جو من شفا رابغ الى حـد اليمـن=ومن الحسا لحـد جـال المشهـدي
وصار الوعد ملقى عيال الضيغمي=حجر بالصريف والدمـا معـوّدي
وصاروا فراعين ٍ تبي لمسة السماء=وقام البعض فوق البعض يترفّـدي
جاهم من الغربي نضايض متعـب=نجم على راس الفراعيـن ارجـدي
وقـام يتدخـل بالدويـش مبـارك=يبغى عن البوقـات بـه يتجـوّدي
قال العوض يابن الحميدي روسنـا=وعن حس زجر الليث ودّن لبلـدي
مانـي بالسبـع الضـروم مقابلـه=سبع الضواري للضواري يسنـدي
تحيتي